السفر الي روسيا , انواع الفيزا , المعوقات وكيف تتغلب عليها بالشرح كاملا
في المقال ده هنتكلم عن السفر الي روسيا وكيفية التغلب علي الصعوبات اللي بتقابلك قدر الامكان . عشان في ناس كتيير بترجع من المطار وللاسف بعد ما تصرف فلوس كتيير تعبت فيها . والشخص بيتفاجيء بالمعامله للاسف السيء خاصة في مطارات روسيا .
اولا : ايه هيا انواع تاشيرة روسيا اللي تقدر تطلعها
هناك عدة انواع للفيز في روسيا :
الفيزا السياحيه :
وهي تاشيرة سياحيه بتصدر من السفارة في مصر بتحتاج اوراق مثل كشف حساب بنكي وخطاب من العمل او السجل التجاري والجواز وصورتين .
مشكلة التاشيرة السياحيه انها بتحتاج منك حجز فندق مدفوع مقدما في روسيا ودي مخاطره كبيرة عشان تدفع حجز فندق يتعدي ال10 الالاف جنيه قبل الحصول علي التاشيرة . ومتعرفش هل التاشيرة هتقبل ولا تترفض هل الفندق اللي دفعته كويس ولا وحش وكمان مطار روسيا رخم جدا .ممكن يرفض دخولك وده هيضيع عليك حق الفندق .
التاشيرة الدراسيه :
التاشيرة الدراسيه منتشره جدا في مصر وهي تاشيرة تلات شهور بتاخدها بدعوه من جامعه روسيه للدراسيه فيها ودي تاشيرة تسمح لك بعمل اقامه في روسيا طول مدة الدراسه في الجامعه . سنه وتجدد وتقدر تشتغل بيها عشان تصرف علي نفسك وتسكن في سكن تبع الجامعه والتكلفه بتاعتها تبدء من 1500 دولار وتزيد حسب التخصص وحسب الجامعه وبتحتاج منك :
الاوراق التاليه :
صورة المؤهل بتاعك
صورة الجواز
2 صورة شخصيه
التاشيرة البيزنس او تاشيرة رجال الاعمال :
دي تاشيرة بتطلع بدعوه من روسيا وهي دعوه تجاريه من شركة في روسيا يتم توثيق الدعوه من روسيا وارسال الدعوه الكترونيا برقم دعوه يمكن التاكد منه من قبل السفاره . ثم بعد ذلك بالجواز وصورتين تقدر انك تحصل علي تاشيرة من السفارة والتاشيرة نوعين وهي
تاشيرة 3 شهور دخله واحده
وهي تاشيرة لمدة 90 يوم وصلاحيتها كذلك 90 يوم بتصدر في خلال 20-30 يوم من بدء الاجراءات وتكلف في حدود 6500 جنيه .
تاشيرة سنه متعدده الدخول رجال اعمال :
دي تاشيرة اقامه وصلاحيه لمدة سنه بتنفذ في خلال 20-30 يوم ايضا ويمكن الدخول بها اكتر من مره الي روسيا .
اخيرا : تاشيرة الزيارة الشخصيه لروسيا :
وهي تاشيرة تصدر من خلال ارسال دعوه شخصيه من شخص في روسيا روسي او لديه اقامه في روسيا ويتم الحصول علي التاشيرة من السفاره في مصر بعد ارسال الدعوه من روسيا .
المعوقات اللتي تقابل المسافرين الي روسيا
للاسف روسيا سهله نسبيا في الحصول علي التاشيرة بتاعتها ولكن بعد الحصول علي التاشيرة بيكون المسافر ظن انه الموضوع انتهي ووصوله الي روسيا اصبح مجرد ايام ولكن روسيا من الدول الصعبه جدا اللي بترخم علي المسافرين وخاصة المصريين في مطاراتها هناك وبتوقف المسافرين هناك في المطار فترة طويله وممكن ترجعك من المطار كمان :
اولا قبل مانتكلم عن المعوقات والمشكلات اللي هتقابلك في المطار في روسيا خلينيا نظبط ورقنا قبل السفر :
دلوقتي اوراقك لازم تكون كالتالي للسفر الي روسيا :
1- التاشيرة ساريه
2- حجز طيران مؤكد ذهاب واياب
3- حجز فندق مؤكد متناسق مع حجز الطيران
4- تحليل كورونا قبل السفر ب 48 ساعه
5- يكون معاك فلوس ( كاش في ايدك )
كده انت كل اوراقك سليمه ومستعد للسفر الي دولة روسيا الاتحاديه .
ازاي تتغلب علي الصعوبات اللي هتقابلك في المطار في روسيا .
الموظف في المطار في روسيا عنده تعليمات ان ميدخلش اي مسافر هو شاكك انه جاي لغرض غير الغرض الموجود في التاشيرة او ان يكون غير قادر علي تحمل مصاريف اقامته او انه هيهرب ومش هيرجع في ميعاده .
عشان كده لازم تعمل التالي :
1- مظهرك الشخصي لازم يكون كويس جدا .
2- لازم يكون معاك فلوس وبزياده .
3- لازم تكون واثق من نفسك وترد بثقة ومتقبلش بسهوله انك ترجع لان ورقك صح كله .
4- لازم تكون منسق مع الشركة وقت وصولك وياريت لو فيه مندوب يستقبلك
5- لازم حجزك يكون مؤكد سواء طيران او فندق وتكلم مع موظف المطار ان حجوزاتك مؤكده مفيش داعي لرجوعك لان لو مش هترجع مش هتاكد حجوزاتك وتدفع فلوسها .
6- لازم تكون فاهم انت رايح روسيا تعمل ايه وتقول كده للموظف ويكون كلامك واحد متغيروش كل شويه عشان اللي رايح يعمل بيزنس في روسيا مش هيفكر في البيزنس ده في المطار اكيد معاه ورق ودارس المووضوع فلازم كلامك يكون واحد وتكون عارف انت رايح تعمل ايه وتقول ده للموظف
هل ممكن ارجع من مطار روسيا وانا معايا تاشيرة سليمة
اه ممكن ترجع وانا شرحت ده في من قبل لازم تخلي بالك موظف المطار في روسيا مش بيهمه اي حاجه ممكن يرجعك لو حس انك مش هتقدر تتحمل مصاريفك او مش هترجع لبلدك الخ .
الخلاصه
لازم تكون فاهم ان السفر صعب شويه وموظفي المطار صعبين في بلدك او بره ده بيرجع لعدة اسباب ان المطارات امن قومي للبلاد وهي منفذ بيدخل منه ملايين المسافرين سنويا وبالتالي لازم يتاكد ان الشخص اللي مسافر مظبوط وكلامه صح مش كدب .